4/09/2016

عودة صديق العمر ...



وانا في أولى ابتدائي، اتعرفت على صديق من أول يوم دخلت فيه المدرسة. كنت بحبه جدا، وكنت ديما بفهمه بسهولة بدون أي تعقيدات وكان ديما بيحل مشاكل كتير .. صديقي دا هو "الرياضيات" ...
كبرنا مع بعض ، وواجهنا مشكلات كبيرة كنا بنحلها ديما بتحدي وندخل على الأصعب منها لحد ما جات مرحلة الإعدادي، وبدأ الموضوع يتطور والتحديات تزيد مع الجبر والهندسة والضرب بمجرد النظر والمعادلات والمربع الدائري والمثلث التلاتيني الستيني والتشابه والتطابق .. وديما كان الموضوع ممتع ورائع وكانت اصعب مشكلة بيتم حلها بسهولة وكنا بنفهم بعض بمجرد النظر.. 
لحد ما دخلت فترة الثانوي ، وبدأ الموضوع يتعقد شوية، ومعدناش فاهمين بعض أوي،  شوية شوية لحد ما دخلنا في "كل جبار ظالم جاتو داهية " و " كل جميل ظريف جاتو عروسة " :D :D .. وهي كده ، ولازم تتحفظ كده.. والتفاضل والتكامل والمثلثات و المتتابعات وكانت النهاية ، مع النهايات .... 
من اللحظة دي بدأ يحصل جفاء كبير بيني وبين صديق العمر الرياضيات .. للأسف معدناش فاهمين بعض لكن كان ديما باب الأمل مفتوح علشان كده، دخلت رياضة ونجحت ودخلت هندسة .. ولكن للأسف .. كل مرة كانت الفجوة بتزيد أكتر .. لحد ما دخلنا في البارشال ، والماتريكس ، والمومنتم .. وكانت الضربة القاصمة ، هي إني نجحت بالعافية في الرياضيات في إعدادي هندسة ،وقررت إني لازم اقطع علاقتي بالرياضيات ، وادخل قسم مبيعتمدش كتير عليه، وكان فعلا ، ودخلت قسم عمارة .. وأثبت لصديقي القديم إني ممكن اتغلب على مشاكل كتير بدونه. 
في الفترة دي اتعرفت على أصدقاء جدد زي النسب والمقياس والموديول والمنظور والظلال وغيرها واشتغلت على برامج جرافيك وثري دي وكنت فاهمها جدا، وكنت ممكن استنتج أي مسقط بكل سهولة وأعمل اي تصميم مهما بلغت درجة تعقيده .. وكانو هما رفقائي المقربين بعد كده ..
دلوقتي وبعد اكتر من عشر سنوات من الجفاء والمقاطعة .. آن الأوان إننا نرجع تاني انا وصديق العمر الرياضيات، نفتح المشكلات القديمة اللي مفهمناش بعض فيها ، ونبدأ نحلها تاني، ونفهمها من الأول. ونعرف ان النهايات مش هي النهاية .. بالعكس دي عندما يقترب المعامل مش يبعد .. وإن البارشال هو تغير ، وجوده معناها إن فيه حركة... وإن الجا والجتا ، معناها إن فيه نبض ... وإن أصدقائي الجدد هما عبارة عن ماتريكس كبيرة معتمدة في الآخر على الرياضيات .. 
من هنا بدأت أفتح تاني كتب الرياضيات، وامسك الورقة والقلم واكتب المشكلة والحل والمطلوب إثباته .. واتعرفنا مع بعض على صديق جديد، مع بعض ممكن ننطلق انطلاقة نكسر بيها الدنيا .. ((البرمجة)) .. 
--------------
علشان كده نصيحتي لكل طالب، إنه يفهم الرياضة ويعرف كل حاجة معناها التطبيقي إيه.. وميعديهاش إلا لما يفهمها كويس .. الحفظ مطلوب طبعا مفيش كلام .. لكن لازم في الرياضة بالذات يكون فيه فهم.

ليست هناك تعليقات :

إرسال تعليق