12/14/2015

سؤال وجواب 4

سؤال1:
 ازاي أبدأ أتعلم العماره صح لأازم أكون عارفه نهج معماري معين وأتبعه ولا اي ؟ حاسه إني تايهه ف القسم ده ومش عارفه أحدد هدفي كويس؟ 
---
الإجابة:
مفيش خريطة طريق معينة للواحد علشان يبقى معماري صح . 
فيه ناس مثلا بيشتغلو في مشاريع كتير ، 
وفيه ناس بيدخلو مسابقات كتير ، 
وفيه ناس بيقرأو كتب كتير ..إلخ .
----
من أكتر المعماريين المشهورين دلوقتي هما اللي تمسكوا بالاتجاه بتاعهم برغم إنه كان مرفوض في الأول .. زي فرانك جيري وزها حديد ..
ممكن تقرأ مقابلات مع أكبر المعماريين في العالم على موقع ديزاين بوم وتعرف اكتر عن حياتهم .وازاي وصلو للي وصلوله : 
http://www.designboom.com/interviews/



سؤال2:
ممكن حضرتك تكلمني شوية أو تفيدني بلينكات عن استخدام و تطبيقات الـ Calculus في مجال العمارة و التصميم ؟

الإجابة:
بصفة عامة التعليم المعماري في الفترة الأخيرة بيتجه بقوة في اتجاه مجال اسمه STEM. Science, Technology, Engineering and mathematics.فـ هتلاقي بالتالي الموضوع بيبعد تدريجيا عن النظريات والفنون Art and theory  مع أهميتهم الشديدة. 
----------------------------------------
الجزئية الثانية : 
كل برامج المحاكاة (حرارة، تهوية، ضوء، إجهاد، حركة، بالإضافة للروبوتيكس ، ومحاكاة الحشود crowd simulation بل والجوانب الاجتماعية كمان بتدخل دلوقت في نماذج رياضية حسابية معتمدة اعتماد كلي على التفاضل والتكامل والمعادلات التفاضلية ). 
---------------------------------------
دي مجلة من أقوى مجلات العمارة معامل التأثير بتاعها 1.623 اسمها 
Journal of Building Performance Simulation.
ادخل كده القي نظرة على الأبحاث المنشورة فيها .. مش هتلاقي صور كتير ،بس هتلاقي معادلات رياضية وديجرامات كتير جدا.
http://www.tandfonline.com/loi/tbps20

سؤال3:
ازاي افكر في تصميم عماره سكنيه؟

الإجابة:
1) أول حاجة قيس القماشة بتاعتك . 
القماشة هي التالي : 
  1.  أبعاد الأرض وحدودها وواجهاتها . 
  2.  الشوارع المطلة عليها . 
  3.  أقصى ارتفاع ممكن . 
  4.  اقل صافي ارتفاع للدور . 
  5.  البروز المسموح . 
  6.  محيط الواجهة .
----
2) بعد كده شوف ممكن المواصفات دي تعمل كام شقة بكام غرفة ؟ بمتوسط المساحة .. حاول تعمل أكبر قدر ممكن . 
----
3) بعد كده ابدأ اعمل موديول تصميمي عادة 1.2 متر * 1.2 متر . 
---- .
4) وابدأ اعمل زوننج للشقق بحيث تحدد أفضل مكان للبطارية يضمن افضل توجيه للوحدات . (على شفافات كتير على قد ما تقدر لحد ما توصل لأفضل حل). 
----
5) ابدأ حل الوحدات ببدائل كتير جدا ، وكل ما اديت التصميم وقته ، كل ما طلعت تصميم أفضل وأقوى مهما كانت أبعاد الأرض وصعوبتها وعدد الوحدات
__
6) بعد كدة مرحلة الإنشائي ، مرحلة مهمة جدا ، بتوزع الأعمدة بحيث تضمن فراغات كويسة وبحيث مفيش أعمدة تيجي في وسط فراغ . 
----
7) بعد كده بتنزل الأعمدة في البدروم (لو هتعمل باركنج) .. وتحل البدروم بحيث تركن عدد السيارات المطلوبة ، عادة سيارة لكل وحدة ،
----
8) وغالبا بعد المرحلة دي بتضطر تطلع تاني في الأدوار السكنية علشان بيكون فيه أعمدة مضطر تغير مكانها ، فبتعيد حل الأعمدة بشكل يضمن توفيق بين الحالتين 6و 7 . 
----
بعد ما تخلص ، ابدأ اعمل التشكيلات زي ما تحب في البلان والواجهات . كيرفات ، معالجات بيئية ، أعمدة ، كاسرات ، إلخ . 
---
بعد كده قفل البلانات ، واعمل الواجهات والمناظير والقطاعات . والإظهار .
----
وفقك الله .

10/10/2015

لقاء مع المعماري ماسيميلانو فوكساس Massimiliano Fuksas

.نستكمل في سلسلة لقاءات مع نجوم المعماريين . المعماري ماسيميلانو فوكساس ، من مواليد عام 1944  للمزيد اضغط هنا  هذه اللقاءات مترجمة ، والغرض الأساسي منها هو الفائدة العلمية والعملية، ومحاولة لتسليط بعض الضوء على ما أحسبه قد يفيد في تطوير العمارة والعمران في بلادنا . 



ما هو أفضل وقت في يومك ؟ 
- بين السادسة صباحاً والسابعة صباحا . بينما لا أزال في السرير. 
ذاك الوقت ، عندما تكون تحلم (لكنك لا تحلم) ، عندما تكون متيقظاً (لكنك لست متيقظاً)، عندما تكون صافي الذهن( لكنك في الحقيقة لا تكون كذلك). عنئذٍ يكون لديك نوع من تجربة شبحية تسمى ، تجربة شبه الإدراك الحسي. 

ما هي الكتب التي توجد على الطاولة المجاورة لسريرك ؟ 
من الصعب أن أقول ، لأني دائما أقرأ 4 أو 5 كتب في وقت واحد، ككثير من الناس أعتقد. آخر كتاب قرأته كان "زعيم الزعماء: كيف لشخص واحد أن ينقذ مافيا صقلية" أما الكتاب الآخر فهو "Camorra" : بواسطة مراسل تحقيقات يكشف عن الجريمة المختبئة داخل التفاصيل المخيفة في المدينة .. 

هل تقرأ مجلات معمارية ؟ 
- أنا اقرأ في مذهبي ، أنا اقرأ ... (من الأفضل ألا أقول) .. أنا لا أقول أبدا . 

عندما كنت طفلا ، هل كنت تود أن تكون معمارياً؟ 
أبداً. هذا الطموح جاءني متأخراً جدا، عندما كان عمري 20 عاما، كنت أريد أن أكون شاعراً، وبعد ذلك أردت أن أكون فنانا، العمارة كانت حقيقة هي آخر خياراتي . 

أين تعمل في مشاريعك وتصميماتك ؟ 
في كل مكان ، في الردهة ، في المطار ، في الطائرة ، يمكنني أن أعمل هنا (ينظر حوله في المكان الذي يقف فيه)، في خيالي . في السرير من الساعة السادسة حتى السابعة ، دائما ما أقول : " ليس هناك مكان مخصص للعمل والإبداع" . 

هل تناقش أعمالك مع معماريين آخرين أو مصممين ؟ 
- لا. 

صف اسلوبك ، كما سيصفه صديق مقرب لك ؟ 
- في حياتي كلها ، حاربت ضد التشكيل والطراز والكتل . عملي دائما للفهم . نوع من دراسة الحقائق والمشكلات ، تحديات تنموية ، بعد ذلك ،أفضل أن أستخدم عناصر واضحة وقوية ، عادة ما يكون في الاساس كتلة بسيطة ، ثم أقوم باللعب بها على مقياس كبير. إنها كالموسيقة، في بعض الأحيان تقوم بتكرار إيقاع ما ، في أحيان إخرى يكون هناك تنوع ، في أحيان أخرى تكون حفلة موسيقية صاخبة.

برجاء، وصف تطور في أعمالك ، منذ مشاريعك الأولى حتى الآن؟ 

للأسف، لا يوجد تطور. أنا استخدم لغة مختلفة في كل مرة ، لكن المفهوم يظل كما هو. في المرحلة الأولى يكون هناك صراع جدلي عندما تتبارى فكرتين متضادتين مع بعضهما ; لو كان هنا خرسانة ، سأستخدم قماش في مكان آخر . دعني أضع هذا هنا بهذا الشكل ، لا أستخدم فقط "أ" ، ولا أستخدم فقط "ب" . من الممكن أن يكون "أ" في الخارج و "ب" في الداخل. 

هل يمكنك توضيح ذلك في مشروع معرض ميلان للتجارة ؟ 
هذا المشروع من أكبر المباني في أوروبا، وقمنا بطي الزجاج والحديد كما لو كان قطعة قماش على المبنى . في مكان ما في المنتصف هناك فراغ مفتوح ، يمكن استخدامه كمنصة معرض مفتوحة ، الهواء - أعتقد - ضروري .
كذلك ، فتحات الإضاءة المخروطية في السقف ، تشبه جبال الألب في الخلفية ، وتجلب الضوء للمعرض من الداخل، متناوبة مع الحديد والواجهات البرتقالية منشئةً لحوار انسيابي بين مختلف أنواع العناصر الإنشائية . 


وماذا عن مشروع قاعة زينث الجديدة للموسيقى في ستراسبورج ؟ 
هناك صندوق بيضاوي خرساني ، يحوي بداخله القاعة الفعلية للموسيقى. و"غشاء من النسيج" تتخذ شكلها بواسطة خمسة قوائم حديدية تدور حول الواجهة كأطواق حولا. قمنا بعمل المبنى قريب الشبه من الخيمة ،لكن لحسن الحظ فإن خامتها تذهب بها إلى ما وراء ذلك . ففي النهار ، يكون الغشاء مشبعا باللون البرتقالي ، وفي الليل ، عندما يكون المبنى مضاءاً ، يكون كأبجورة عملاقة تظهر العناصر الإنشائية الداعمة ، كما تظهر إسقطات ضوئية لفيديوهات وصور وكتابات لما يحدث في الداخل، كلوحة عملاقة.


ما هو المشروع الذي أعطاك أكبر قدر من الرضا ؟ 
الكثير من المشاريع المبنية وغير المبنية ، من الصعب جدا الاختيار . 

من الذي تود أن تصمم له ؟ 
التصميم في المدن المعاصرة ، لأن 60% من العالم يسكنون في المدن . 

هل هناك أي مصمم أو معماري من الماضي تقدره بشدة ؟ 
كذلك مبنى آيا صوفيا في اسطنبول . 

والعمارة الحديثة ؟ 
مبنى دار الأوبرا في سيدني . 

ما هي نصيحتك للمعماريين الصغار ؟ 
ليس لدي نصيحة لهم ، لكن ربما هم يستطيعون إعطائي نصيحة لمساعدتي ، أظن أن المعماري الصغير اليوم يجب أن يكون ثوريا بشكل أكبرمما رأيناه وبنيناه على مر 40 عاما. 

ما الذي تخشاه من المستقبل ؟ 
انا أخشى من ألا يختار العالم الطريق الصحيح ، وأعني "بالصحيح": السلام ، تعدد الأعراق، وتعدد الديانات وتعدد الثقافات . 


المراجع :
“Massimiliano Fuksas Interview.” Accessed October 10, 2015. http://www.designboom.com/interviews/designboom-interview-massimiliano-fuksas/.

9/15/2015

اهم حدث في التاريخ .. نظرة تفكر .

تعرف أهم حدثين حصلو في تاريخ البشرية منذ خلق الله الأرض إلى يوم القيامة ؟ 
ولحسن الحظ واحد منهم حصل وشوفناه وعشناه بالفعل , التاني لسة هيحصل.
مش قاصد أقول كلام فلسفي ، لكن فعلا :
ميلاد الإنسان ووفاته هما أهم حدثين في التاريخ بالنسبة لكل شخص ، بيحصلوا مرة واحدة كل ملايين السنين أو مليارات أو ما شاء الله من عمر الكون إلى يوم القيامة
انا بقول الكلام دا علشان نحس باللحظة اللي احنا عايشين فيها واللي ناس كتير مننا خلصو جزء كبير من رصيدهم في الدنيا.. 
من ملايين السنين مكنش لينا أي وجود على الأرض، ومكنش حد يعرف إننا هنيجي إلا علام الغيوب ، وبعد كام سنة مش هيبقى لينا وجود غير الأعمال اللي احنا بنعملها دلوقتي .. 
فعلا حدثان يستحقان النظر والتأمل.
ربنا خلق الموت والحياة علشان يختبرنا هنعمل إيه ويختبر مين فينا أحسن عملا.
مش دعوة لليأس والإحباط ، لكنها دعوة للتفكر والتأمل والتوبة وتجديد النوايا والعمل الصالح فكرت فيها وحبيت اشارك بيها .. 
كده كده الإنسان بيسدد وبيقارب وبيجدد نيته ويحسنها ، والإنسان المؤمن خلق مفتنا توابا إذا ذُكِرَ ذكر . ولن يدخل أحد الجنة بعمله .. إنما برحمة الله . 
علشان كده كل ما الإنسان يقع في ذنب أو خطأ ، عليه انه يتوب ويستغفر ولا يقنط من رحمة الله .. ويجدد العهد مع الله .. ويعمل الأعمال الصالحة . 
--
هي أيضا دعوة للناس اللي بيقتلوا الناس عمدا بغير نفس أو فساد في الأرض .. يتفكر في النفس اللي بيقتلها ومدى الجرم اللي ارتكبه . 
--
دعوة أيضا للشباب اللي ممكن يضيع حياته لسبب ما ، أو يفكر ينتحر بسبب أزمة مرت بيه.. أو حتى يضيعها في الإدمان وما لا ينفع .
.
ربنا يغفر لنا جميعا ، ويصلح لنا أعمالنا. 
احنا مقبلين على أيام طيبة مباركة ، ممكن نجدد فيها النوايا والعهد والوعد مع الله .

9/13/2015

اكسر الحواجز وانطلق ..


الفرحة الحقيقية ، هي الفرحة بالوصول بعد طول الطريق وكثرة التحديات .
-----
متزعلش من التحديات والصعوبات اللي بتقابلك ، بالعكس ، هي دي القوة الدافعة، هتزيدك قوة وخبرة .. ومتترددش في خوض التحديات لأن الوصول للقمة لازم يكون فيه قرارات قوية وجريئة ، 
كل ما تكسر حاجز .. بص على الحاجز اللي بعده وقوله : " أنا جايلك .." . واستعن بالله وانطلق . 
فيه حاجات هتقابلك ، هتبسطك شوية ، لكن دي ممكن يكون ليها أثر سلبي ، عاملة زي المخدر أو المسكن اللي بيخليك ترتاح وتتعطل شوية في طريق الوصول لهدفك . 
مفيش مشكلة إنك ترتاح شوية في كل محطة ، لكن متركنش ... مون وانطلق أقوى وأسرع .
و خليك فاكر .. " إن السفينة اللي راكنة على البر هتفضل ديما في أمان ، لكنها متصنعتش علشان تركن على البر " .. 

9/11/2015

لقاء مع المعماري تويو إتو : Toyo Ito

إن شاء الله سأحاول - في وقت فراغي -  ترجمة بعض اللقاءات مع كبار المعماريين حتى نستفيد منها في جانب العلم والتعليم المعماري وتطبيقاته للطلبة والمعماريين على سواء . مع التأكيد على بعض النقاط التي أعجبتني في اللقاء . 
محمود عوف



 لقد ذكرت من قبل أن "المعماريين جعلوا العمارة شديدة التعقيد". ماذا يمكن فعله لمعالجة هذه المشكلة وتسهيل وصول العمارة للجميع ؟ 

 تويو إيتو : بدلا من التعقيد، اعتقد أن المشكلة تكمن في محاولة المعماريين توصيل الرسالة فقط لعالم المعماريين. ولكننا - كمعماريين - يجب أن نوجه انتباهنا أكثر للمجتمع وأن نوجه الرسائل للمستخدمين
---
 بعد زلزال 2011 المدمر في اليابان، بدأت مبادرة "منزل للجميع" مع المعمارية كازويو سيجيما والمعماري ريكن ياماموتو .ما هو دور المعماريين للتعامل مع مثل هذه الكوارث ؟ 

مبادرة مبنى للجميع - صورة مبنى لصياد
تويو إيتو : بعد زلازال 2011 الكبير في شرق اليابان ،قام المجتمع المحلي في المناطق المتضررة بطلب المساعدة من المهندسين المدنيين، وليس من المعماريين. وتم رفض المقترح الذي قدمناه -أقصد المعماريين-  لإعادة الإعمار. لذلك قمنا بجمع الدعم و تقديم منازل للمجتمع تحت مسمى " منزل للجميع" للمجتمعات السكنية المحلية. إن أكثر مباني مبادرة "منزل للجميع" هي منازل صغيرة لمجموعة من الناس معا، يتحدثون معا ، ويأكلون معا. و بعض المنازل لدعم مهنة الصيد والزراعة والبعض الآخر تسمح للأطفال القاطنين بجوار محطة المفاعل النووي باللعب داخل المنزل . تم الانتهاء من ثلاثة عشر "منزل للجميع". وهذه المباني هي أيضا رسالة من المعماريين للمستخدمين.
---
مسرح تايشونج القومي في تايوان قارب على الانتهاء. هل يمكن إخبارنا بالمزيد عن هذا المشروع ، وما هو شعورك تجاه ذلك ؟ 

تويو إيتو : انطلقت المسابقة الخاصة بهذا المبنى في نهاية 2005 ، و قد قارب على الانتهاء بعد 10 سنوات ، تقريبا كل الفراغات تتكون من مسطحات منحنية ثلاثية الأبعاد. وعلى الرغم من أنه مشروع شديد الصعوبة بدءا من التصميم حتى التنفيذ، فإن المبنى محبوب من المواطنين . وتم افتتاح المبنى مؤقتا العام الماضي وحضر العديد من الناس إلى الساحة الخارجية للاستمتاع بالنشاطات. من المزمع أن يكون الافتتاح الرسمي في سبتمبر 2016 على الرغم من أن الكثير من الأحداث تم جدولتها بداية 2016.
---
مسرح تايشونج القومي بتايوان

لقد قمت بالعمل في مشاريع ذات مقاييس مختلفة ، بدءاً من أبراج متعددة الطوابق، إلى مباني سكنية خاصة وكذلك معارض مؤقتة. كيف يختلف المدخل التصميمي مع هذه المقاييس المختلفة ؟ 

تويو إيتو : مدخلي التصميم دائما يكون من خلال محاورتي للمستخدمين ( السكان ، المجتمع المحلي ، والعميل). ولكني دائما أحاول العمل على مشروعات عامة ذات تحديات كبيرة وذلك للبعد عن الأفكاروالحلول الجاهزة. وكذلك لفتح عهد جديد في العمارة .
بخصوص العمارة ذات المقياس الصغير ، فأنا افضل المنازل . أنا استمع جيداً للعملاء و أحاول أن ألبي طلباته بقدر المستطاع لخلق فراغات  مريحة لهم. 
---
بجانب اعمالك في اليابان ، فقد قمتَ بعمل مشاريع في أوروبا و أمريكا الجنوبية . ما هي أكبر الفروق يبن العمل في هذه الثقافات المختلفة ؟ 

تويو إيتو : أنا اعتبر أن خلق عمارة في مكان ما أذهب إليه لأول مرة شيئاً ممتعا و يمثل تحدياً كبيرا. دائماً أضع نصب عيني في مثل هذه المشاريع بدلا من محاولة فرض اتجاهي المعماري على البيئة ، أحاول أن أسلط الضوء على البيئة من خلال أفكاري الخاصة. وعادة تكون هذه البيئة نابعة من شخصية المكان التي يمكن تمييزها بسهولة بواسطة الأجانب . 
---

ما هي أفضل نصيحة قيلت لك ؟ وما هي النصيحة التي توتد اعطاءها للمعماريين والمصممين ؟

تويو إيتو : أفضل نصيحة تلقيتها عندما كنت صغيرا " لا تفكر برأسك فقط ، فكر بجسدك كله " . إن التصميم الذي أظن أني أحببته برأسي، يمكن أن تتغير فكرتي عنه في خلال ثلاثة أيام . لكن التصميم الذي أظن أني أحببته بجسدي ، لا تتغير الفكرة على الأقل خلال سنوات . وأود أن أنقل نفس النصيحة لشباب المعماريين والمصممين . 

-----
للمزيد عن المعماري تويو إيتو : https://en.wikipedia.org/wiki/Toyo_Ito

ارسم خريطتك نحو النجاح ...

لو عندك هدف عظيم .. اتحرك علشانه .


لو مش عارف الطريق ، ابدأ ارسم خريطة للوصول ، متستناش إن حد يرسملك الخريطة .أو إن حاجة تحصل علشان تتحرك .. الناس ديما بتقدر الشخص اللي رسم الخريطة مش اللي مشى وراها ..
لو الطريق مش واضح. اتأكد إن طول ما انت مكانك ، عمره ما هيكون واضح . لازم تتحرك ، ولما تتحرك هتبدأ تبان المعالم وهيكون سهل تشوف الهدف من زوايا تانية ...
----
ارسم خريطتك بنفسك .

قبل أن أموت أريد أن ....

في التدريب الصيفي للطلبة اللي داخلين أولى هندسة من يومين وبيحاولو يحددو التخصص اللي هيدخلوه , كنت لسة بسألهم هم عايزين يدخلو قسم إيه ؟ وليه ؟ فللأسف مكنش فيه حد من الجالسين عنده هدف واضح .
.. فحكيت لهم قصة "قبل أن أموت أريد أن " ولقيت إن فيه محاضرة في تيدكس بتتكلم عن نفس الموضوع . 
دي شوية محاضرات كويسة جدا ممكن تساعد حد في تحديد أهدافه ، والانطلاق ليها .

سؤال وجواب 3

سؤال 1:
السلام عليكم يا بشمهندس أنا متخرجه السنادي ونفسي ابقى معيده لكن الحقيقه مش عايزه ابقى اسم على الفاضي لاني شفت في القسم بتاعي اغلب التات (TAs) مابيفيدوش الطلبه تنصحني بايه للمهنه دي عشان ابقى قدها واقدر فعلا اساعد الطلبه واطور في التعليم المعماري في مصر لاني تايهه جدا ومش عارفه ابدا منين؟ 


الإجابة : 
وعليكم السلام ورحمة الله وبركاته .. 
فيه شوية نقط احب اقولهم بخصوص السؤال اللي حضرتك طرحتيه : 
------------------
أول حاجة : إن الواحد طلاما اتحط في موقع تعليم الناس يبقى لازم ميبطلش يتعلم أبدا ويقرأ كتير ولا يبخل أبدا بأي معلومة يعرفها. 
-
تاني حاجة : التحضير الجيد جدا لموضوع هو مفتاح توصيل المعلومة بسهولة واختصار 
"If you can't explain it simply, you don't understand it well"
ومفيش اي مشكلة لو واحد مش عارف حاجة يقول مش عارف ، أو يراجعها فيما بعد ويصحح المعلومة الخطأ .. لكن مش كويس إن الواحد يفتي . 
-
تالت حاجة : مهمة جدا واتقالت لي قبل كده وهي الرحمة ، تعليم الناس بيقتضي الرحمة باللي مش عارف زي ما الرسول عليه الصلاة والسلام كان رحيم بالأعرابي اللي كان بيتكلم في الصلاة بدون علم (رابط الحديث في الأسفل) ، 
-
رابع حاجة : الاحترام والتقدير للطالب ، في نفس الحديث السابق بيقول الراوي " فبأبي هو وأمي ما رأيت معلما قبله ولا بعده أحسن تعليما منه والله ما كهرني ولا شتمني ولا ضربني " .. لأن للأسف فيه اللي بيزعق ويشتم :) :).ويدخل ضمنها برضه عدم وجود عداوة شخصية بين الطالب والمعيد . 
-
خامس حاجة : العدل والمساواه بين جميع الناس وعدم التمييز على اي أساس.
وأسأل الله أن يوفقكِ وينفع بكِ ويبلغك فيما يرضيه آمالك . 
------------------------------------------------------------
رابط الحديث : 
http://library.islamweb.net/newlibrary/display_book.php?idfrom=22646&idto=22656&bk_no=6&ID=1122

سؤال2:
بعد إذنك يابشمهندس عايز لينك او صفحات او مواقع بتنزل مسابقات فى مصر وبرة مصر ..وياريت تكون المسابقات من غير اشتراك مادى :D :D‏ ؟

الإجابة:
موقع Death By Architecture
www.deathbyarchitecture.com

سؤال3 : 
طب انا عندي مشكله يا دكتور اني فعلا اتفرجت كتيرعلي مشاريع و معلق معايا مشروع واحد كل ما اشتغل اقعد الف كتير و اطلع شغل كتير و في الاخر اوصل لنفس فكرة المشروع اللي شوفته,خايف كدا اني اكون بغش او بسرق فكرته اعمل ايه؟

الإجابة: 
هو الطبيعي إن الواحد لما بيتفرج على مشروع ويعجبه ويشربه ، بيتأثر بيه ،
. لكن المشكلة إن بعد كده تبقى كل المشاريع بنفس فكرة المشروع دا
فيه حاجة في عملية التفكير الإبداعي اسمها " الطلاقة" وهي القدرة على توليد اكبر قدر ممكن من الأفكار الأصيلة .. بتبقى محتاجة مجهود شوية علشان تبعد عن الفكرة اللي ثابتة عندك .
ممكن تقرأ في مواضيع مختلفة ، او تكنولوجيات جديدة أو مشاريع كتير وتوفق بين الأفكار المختلفة ..
فيه فيديو جميل جدا سمعته قريب في تيدكس اسمه : 
كيف تفكر مثل المخترعين في إم آي تي ميديا لاب MIT Media Lab



سؤال 4:
انا دلوقتي في اعدادي هندسة المطرية حلوان؛وانا ناوي من زمان اني اتخصص عمارة ولما سالت عن القسم عندنا عرفت انه مستواه مش تمام اوي بس تقريبا كل الناس اللي بثق في خبرتهم قالولي ان دراسة الكلية بتفيدك بس30%من الاستفادة اللي هتستفادها في سوق العمل والباقي على الكورسات والتدريبات ف فعلا محدش هيهتم بالمكان؟

الإجابة : 
رايي إن اللي بيدي للمكان اسم هو الناس اللي بيتخرجو من المكان دا .. لما بيسمعو كويس في السوق ، بيرفعو اسم المكان . 
علشان كده ديما بقول إن المفروض يكون الطالب هو أحرص الناس على رفعة المكان حتى لو فيه من العيوب والمساوئ والظلم و غيره . 
لأن دا هينعكس عليه بالتالي إيجابا .
غالبا أصحاب الأعمال مش بيهتمو أبدا بالإداريات الخاصة بكل قسم ، لكنهم بيهتمو بالمنتج والخريج نفسه.
هديلك مثال بسيط كده بس بدون ذكر أسماء . 
المسابقات المعمارية من الحاجات المهمة جدا في تحسين سمعة المكان أو حتى تحسين الأداء الداخلي والتنافس بين الطلاب . 
ففي الفترة الأخيرة مثلا لو انت متابع المسابقات في مصر ، هتلاقي مثلا كام كلية أو معهد ديما اسماءهم بتتكرر في الجوائز الأولى . 
دا بيرفع اسم المكان وبيعود على الطلبة والقسم بالإيجاب .
كمان من ضمن النصائح الكويسة اللي عبجتني من الدكتور ميتو إنه قال إن كل قسم عمارة على مستوى الجمهورية ممكن يتخصص في جزئية معينة كده يتميز فيها . مثلا قسم عمارة المنصورة يتخصص في التصميم الديجيتال، وقسم عمارة المطرية يتخصص في العمارة الخضرا ومحاكاة المباني ، وقسم عمارة كفر الشيخ يتخصص في الروبوتيكس .. وهكذا ..

6/08/2015

من وحي الامتحانات -1

#امتحانات_هندسة
النهاردة لتاني مرة على التوالي .. ضبط طالب بيغش في اللجنة اللي كنت فيها . 
أنا أصريت يتعمل له محضر (ودي حاجة متزعلش) لكن الدكتورة مراقبة الدور مرضيتش تعمل له حاجة .
---------------
الخبر الموجود في الصورة  بيقول نشر طائرات بدون طيار لكشف الطلبة اللي بيغشو في الصين .. 
----------------
للأسف الشديد المنتجات والخدمات المصرية كلها بتنافس الصين في رداءتها و غشها .. واللي بيغش دلوقتي في الامتحان بكرة هيطلع دكتور معندوش ضمير او مهندس بيوفر في التسليح والخرسانات او مدرس كل همه يدي دروس خصوصية ..
وفي الآخر بلد فقيرة مستهلكة غير منتجة .مليانة ثروات لكنها عالة على كل دول العالم



6/07/2015

سؤال وجواب 2

سؤال 1
بش مهندس شو هية لغات البرمجة ال ممكن تساعد المعماري في شغلو تسرع الشغل ايضا؟؟!!

انت لو اتعلمت أي لغة برمجة صدقني هتلاقي الباقي كله سهل لأنه نفس الكونسبت ، والفروق في حاجات مش كبيرة اوي . 
انصحك تبدأ بـ Python هتساعدك كإضافات للبرامج وكويسة في الحوسبة Computation .. ولغة سهلة .
وبعدين C++ هتساعدك في تطوير أدوات وبرامج جديدة وسريعة جدا.. بس لغة صعبة شوية . وممكن Java وممكن PHP لو انت مهتم بتصميم المواقع.

سؤال 2:
استازى ومعلمنا اولا ربنا يجزيك خير على كل العلم الى بتفيد بيه الناس ثانيا احنا فى مشروع تخرج تنصحنا نعمل ايه علشان نكون متميزين فى الاظهار فى الشوب فى تفنيش المساقط المكس ؟

ربنا يكرمك يارب .
أنصحك بإنك تشوف اسلوب الإظهار اللي انت عايز تفنش بيه مشروعك من دلوقتي .. 
وحاول تتدرب عليه كتير من بدري .. وأسأل عن طريقة تنفيذه .. متسيبش الخطوة دي للآخر واعمل تجارب كتير .

سؤال3:
لو سمحت يا بشمهندس عاوزين طرق نظهر يها الشاسيه ونبين الكونسبت بتاعتنا فيه؟

فيه تلات نقط مهمة : 
1- أهم حاجة ، أي طريقة من الطرق اللي هوريهالك أو اللي انت هتشوفها وتعجبك ، حاول تدرب نفسك عليها من بدري.. كل يوم ساعة أو اتنين تتدرب على طريقة الإظهار دي بعينها ... اوعى تجرب في الشاسيه النهائي . 
2- مفيش قواعد ثابتة في الإظهار .. اي حاجة تشد العين وتكون شكلها كويس وتوضح الفكرة بأي طريقة منطقية
3- مش لازم علشان انت لونت ، يبقى هتجيب درجة أعلى من اللي عامل رصاص او حبر ، الموضوع مش كده ، الموضوع له علاقة بالمنتج النهائي وترابط التجميع و تنظيمه وإظهار الفكرة .. ونضافة الخطوط . طبعا دا غير الحل والعلاقات وغيرها بس انا بتكلم عن الإظهار.
دي بعض الأمثلة وطبعا النت مليان حاجات . 
اظهار رصاص او تحبير : 
https://www.pinterest.com/pin/377317275003612399/
إظهار على لون :
https://www.pinterest.com/pin/565694403166797059/
اظهار negative.
https://www.pinterest.com/pin/66498531972361410/
تهشير : 
https://www.pinterest.com/pin/436215913884252394/
ألوان : 
https://www.pinterest.com/pin/446771225504679394/
دراسات تفصيلية : دي تنفع كويس اوي في اظهار الفكرة والدراسات .
https://www.pinterest.com/pin/485896247272303787/
اظهار بسيط جدا : لون واحد بس بالإضافة للرصاصي : 
https://www.pinterest.com/pin/484559241134422422/
إظهار جميل جدا بيدي إحساس الفري هاند وإن كان معمول بالمسطرة. (لاحظ التشنيب وعدم استواء جميع الخطوط وظهور خطوط العمل) .
https://www.pinterest.com/pin/566327721867354509/
https://www.pinterest.com/pin/517491813409848485/
https://www.pinterest.com/pin/296393219200368562/

أصنام يجب كسرها (الثانوية العامة)

اللهم وفق طلبة الثانوية العامة وسددهم جميعا يارب ..
-------------------------------------------------------------
أوعى درجة الثانوية العامة تحبطك أو تكسر عزيمتك .. وأوعى تكون درجة الثانوية العامة سبب في إنك تتكبر على خلق الله . انت عندك هدف حاول توصل له بأي طريقة ... والثانوية العامة مجرد خطوة زيها زي أي خطوة في حياتنا .. لو مدخلتش الكلية اللي انت بتحبها .. احمد ربنا أولا ، وثانيا حاول تسعى جاهد إنك تدرس الحاجة اللي بتحبها حتى لو مجبتش درجتها (الأمثلة حولينا كتير) .. ومتكونش أسير للدرجة . مش معنى انك جبت 99% يبقى لازم تخش طب .. أو صيدله ..
فيه واحد صاحبي في ثانوية عامة كان عبقري في الميكانيكا وكان بيحبها جدا .. لكن للأسف مدخلش كلية هندسة .. وقابلته بعد التخرج بيبيع في محل ملابس .. يا ريته يكون بيقرأ الكلام دا ويكمل في دراسة الميكانيكا ..
انا ليه كاتب  للموضوع دا ؟ 
علشان اقول ان الامتحان بيتسرب والإجابات بتتسرب عادي خالص .. وفي الآخر بنلاقي أحيانا بعض طلبة عندنا في كلية الهندسة مثلا محتاجين يعيدو ابتدائي واعدادي من الأول .. وبنلاقي طلبة بتتفنن في الغش في الامتحان .. والبلد محرومة من مواهب حقيقية للأسف علشان مش عارفين يحفظو "نجيب محفوظ يتذكر" أو الموشحات الأندلسية أو حتى كان خايف من رهبة الثانوية العامة أو مش معاه فلوس يدفع علشان ياخد درس واتنين وتلاتة في المادة ... والبلد فقيرة و مهزومة وفي أمس الحاجة للشباب الشغوف المحب لعمله ..

5/04/2015

خطواتي الأولى في عمل برنامج محاكاة أداء المباني

First Steps in building My Own Simulation Software. 

يراودني منذ فترة ليست بالبعيدة فكرة التحول من مستخدم برامج لمطور برامج ، وقد عزز هذا الخاطر حاجتي إلى بعض الأدوات لعمل مهام لايوجد برنامج معين يقوم بها . هذا بالإضافة لحبي الشديد للبرمجة وتطبيقاتها.

الغرض الاساسي حتى الآن هو تعلم لغة البرمجة خاصة برمجيات الجرافيكس ، لكن الهدف التالي هو عمل نموذج محاكاة لأداء المباني على مستوى التصميم المعماري والعمراني . 

لغة البرمجة المستخدمة : C++
المكتبة المستخدمة : OpenGL , GLut

إن شاء الله سأقوم بنشر كل التطورات هنا : 






4/02/2015

Creative Coding .. Free Online Course .

دورة مجانية عن البرمجة الإبداعية واستخدام لغات البرمجة في انتاج الصور والأصوات والتحريك ..من موقع www.futurelearn.com

على الرابط التالي :
https://www.futurelearn.com/courses/creative-coding


4/01/2015

مقرر تطبيقات الحاسب في العمارة للفرقة الأولى بقسم عمارة

بفضل الله تعالى ، تم إتاحة مقرر تطبيقات الحاسب في العمارة للفرقة الأولى عمارة جامعة كفر الشيخ 2015 ليتم تدريسه أونلاين مجانا لجميع الطلبة الراغبين في دراسته في العالم العربي .يمكنك متابعة المحاضرات والحصول على تقييم وشهادة تقدير معتمدة من قسم عمارة جامعة كفر الشيخ على الرابط التالي :

في هذه الدورة سيتم شرح برنامج 3DsMax2014 و Vray  للمبتدئين .
http://ain-academy.com/KFS-ca/index.php


2/20/2015

مسابقات لم أكسبها

من الكلمات اللي تقريبا بيتفق عليها كبار المعماريين من خلال دخولهم في المسابقات المعمارية هي إنه لفترة طويلة جدا كان بيدخل مسابقات ويخسر لكن بيكون سعيد جدا بمجرد المشاركة .
كلمة قالها الدكتور أسامة فرج في أثناء حوار معه :"تكررت سلسلة عدم الفوز في المسابقات لدرجة - كنوع من المداعبة مع زملائي - هعمل كتاب (مسابقات لم أكسبها) ".
اسمعو الحوار بالكامل على الرابط التالي (يوجد أكتر من جزء) : 


1/22/2015

ليه كمعماري محتاج أتعلم برمجة ؟ !!

سؤال اتسأل لي من ناس كتير ..
هستفيد إيه كمعماري لما اتعلم برمجة ؟
أنا هحكي عن موقف حصلي شخصياً..

واحد صاحبي كان شغال في المشروع الموجود في الصورة (مشروع مركز ثقافي في الكويت) ...  وكان مطلوب منه عمل حصر للتغطية لحساب الكميات وتنفيذها في الطبيعة . التغطية دي تحتوي على 2081 قطعة GRP مختلفة في المساحة كل قطعة ممكن تستغرق وقت طويل لحساب مساحتها وتصنيفها. 

استغرق الوقت مني لعمل الكود تقريبا 10 دقائق باستخدام لغة البايثون الملحقة ببرنامج Rhino.. واستغرقت عملية الحساب اقل من 30 ثانية وتم استخراج كل قطعة مكودة بكود معين و مساحة سطحها وإحداثياتها في المشروع مع عمل تصنيف القطع ووضع كل القطع المتشابهة في شريحة خاصة.

لو نفس العملية اتعملت يدوياً هتستغرق على الأقل 30 ساعة عمل غير المراجعة والأخطاء اللي ممكن تحصل.

المهم ..

تخيل الوقت الذي يمكننا توفيره في عمليات التصميم والحصر وغيرها.
تخيل المشكلات الكثيرة التي يمكن حلها لزيادة كفاءة المباني التي نعيش بداخلها أو حولها .

1/13/2015

كتب يجب ان تكون في مكتبتك المعمارية


بمناسبة اقتراب موعد معرض الكتاب ، هذه قائمة من الكتب التي يجب ألا تخلو منها مكتبة الطالب أوالمهندس المعماري ،

❶- التصميم المعماري : 

مرجع رائع للمعماريين للتعرف على طريقة تشكيل الكتل و حل الفراغات وتجميعها والعلاقة بين الكتل وبعضها.
يوجد من الكتاب نسخة عربية اسمها العمارة كتلة وفراغ ونظام (مكتبة الأنجلو المصرية) لكني لم اطلع عليها بعد.

Neufert Architecture standards
من المراجع التي لا غنى عنها في مكتبة اي مهندس معماري، يوجد منها نسخة عربية لكن للأسف الترجمة العربية ليست بجودة عالية، الكتاب يشرح نظريات مختلف أنواع المباني السكنية والصحية والتجارية وغيرها .. بطريقة سهلة ويسيرة .

Time Saver Standards
كتاب أو بمعنى أصح مجموعة كتب Time-saver من الكتب المرجعية الكبيرة جدا في نظريات العمارة، هي مجموعة كبيرة من الكتب في التصميم المعماري والتصميمات الداخلية وتخطيط المدن وتنسيق المواقع ونسب وأبعاد جسم الإنسان ..

Design Drawing
كتاب ممتاز جدا يضعك على الطريق الصحيح في التفكير التصميمي والتعبير عن أفكارك بطرق مختلفة واضحة .

Architecture Annual Competitions
مجموعة من الكتب تصدر كل عامين منذ 2002.وهي تعرض عدد كبير جدا من المشاريع الرائعة بدءاً من الفكرة والمفهوم concept و المساقط وغيرها، وأكثر ما يميز هذه المشاريع، طرق تشكيل الكتل والواجهات بأفكار لا متناهية وخامات متميزة.

كتاب تحليل الموقع  Site Analysis (مكتبة الأنجلو المصري)
للدكتور طارق أبو عوف . 
من الكتب الرائعة في دراسة تحليل المواقع من خلال أمثلة مختلفة ومتنوعة .

-----------------------------------------------------
❷- التصميمات التنفيذية :

مجموعة الموسوعة الهندسية المعمارية (مكتبة الأنجلو المصرية) للمهندس عبد اللطيف البقري . 
من الكتب المتميزة جدا والتي تحتوي على تجميع لمعلومات قيمة في التنفيذ والمقاولات وكذلك بعض المعلومات التصميمية والتخطيطية التي تم تجميعها من كتب مختلفة .

كتاب الإنشاء المعماري للدكتور محمد عبد الله (مكتبة الأنجلو المصرية). 
من الكتب الأساسية في تدريس الإنشاء المعماري والتصميمات التنفيذية في الجامعات المصرية .

الرسومات التنفيذية والتفاصيل المعمارية (مكتبة الأنجلو المصرية)
للدكتور محمد عبد الله.

 ---------------------------------------------
❸- التخطيط العمراني :

تخطيط المدن (مكتبة الأنجلو المصرية)
للدكتور أحمد خالد علام.

التخطيط الإقليمي (مكتبة الأنجلو المصرية)
للدكتور أحمد خالد علام.

تخطيط المجاورة السكنية 
للدكتور أحمد خالد علام.

 --------------------------------------------------
❹ - التصميم البيئي :

Sun Wind and Light (تحميل)
يعتبر كتاب رائد في التصميم البيئي ومرجع هام.

(إضافة بواسطة : Moamen Soudany)
Heating, Cooling, Lighting: Sustainable Design Methods for Architects
كتاب ممتاز في التصميم البيئي . 
------------------------------------------
5 - المجلات :

Architectural record 
أفضل المجلات المعمارية التي اطلعت عليها، تحتوي على كل جديد في العمارة على مستوى العالم.

(إضافة في 13-2-2015)
The Architectural Review
تصدر المجلة منذ اكثر من 120 سنة .

(إضافة في 13-2-2015)
Evolo Magazine

إيفولو : تقوم بعمل مسابقة سنوية لتصميم مباني وناطحات سحاب المستقبل Evolo Skyscapers وتصدر مجلة رائعة بها مشاريع مستقبلية ممتازة .

(إضافة في 13-2-2015)
Metropolis Magazine


(إضافة في 13-2-2015)
Detail

مجلة خاصة بالتصميمات التنفيذية التفصيلية ..

مجلة عالم البناء (مجلة مصرية)
مجلة البناء(مجلة سعودية)

إذا كان لديكم اي مقترحات برجاء كتابتها ليتم تحديث الملف . 

سؤال وجواب .

 إن شاء الله هنشر بعض الأسئلة اللي بتتسأل لي بحيث أعرض فيها وجهة نظري وعلى الرحب والسعة أي رأي آخر او نقد أو  اقتراح.وإن شاء الله أحاول اوثقها بقدر الإمكان بالدليل.

سؤال 1: 
سلام عليكم اولا جزاك الله خيرا ع الكورسات الى حضرتك بتنزلها بتفيد ناس كتير انا حد منهم بس انا ليا سؤال لو انا اتخرجت ومش عارف انا بحب ايه علشان اكمل فيه وايام الدراسه كان فيها قصور كبير ابدأ منىن عشان ابقى حد كويس وناجح؟!


الإجابة : 
وعليكم السلام ورحمة الله وبركاته . 
سؤال كويس جدا ومهم .. 
مبدئيا .. انت حابب العمارة ولا لأ ؟ دا سؤال مهم جدا . 
لو مش بتحبها .. من رأيي . أو لو انا مكانك مش هشتغل فيها . هشتغل في الحاجة اللي بحبها..
انت بتتكلم عن التقصير في الدراسة .. دا موضوع خطير . 
للأسف ممكن يكون واحد عنده موهبة كبيرة قبل ما يدخل الكلية ، لكن الدراسة للأسف بتموت الموهبة في بعض الأحيان.. انا لاحظت الموضوع دا كتير جدا. وضده جدا مهما كان السبب ، لو الدراسة مش سبب في تنمية المواهب ، يبقى على الأقل متكونش سبب في قتلها. ومن رأيي إن الحياة الجامعية من أكبر الفرص في حياة الفرد لتنمية مهاراته ومواهبه .. لأنه لسة مش بيكون دخل في جو السوق والعمل التجاري اللي كثيرا ما يفرض على الواحد نمط معين في الشغل .
المهم : 
- حاول تتجرأ وتجرب حاجات مختلفة 
- ابني على الخبرات اللي اكتسبتها في الدراسة حتى لو كانت قليلة . أكيد عندك أساسيات أخدتها حاول تنميها. ولو جالك مشروع معين تعمله
- متقولش(معنديش خبرة) حاول يكون هو المشروع بداية خبرتك ، اتجرأ واشتغل فيه 
- استشير أكبر عدد من الناس (واستفيد من النقد حتى لو شديد) وحاول تراكم خبرات من الشغل حتى لو هتكتب ملاحظات استفدتها بعد كل مشروع

سؤال 2 : 
انا حديث التخرج وحاسس انى معلموماتى مفيش تماما كحال حديثى التخرج تنصحنى حضرتك بكتب ايه اقرأها تقولى كتب لو ممكن ؟ كل ماقدر ممكن ان يرفع مستوايا او يطورنى فى مجال العماره

الإجابة : 
حسب التخصص اللي انت عايز تتخصص فيه واللي انت شايف نفسك بتحبه اكتر .
يعني لو مثلا حابب تتخصص في التنفيذ او التشطيبات .. صدقني لو نزلت اتدربت عملي احسن بكتير من كتب كتير ممكن تقرأها . وفي الحالة دي القراءة هتبقى تأكيد للمعلومات .

لو في التصميم ، حاول متكتفيش بالفرجة على مشاريع كتير .. حاول ترسم أي فكرة تعجبك . وتحللها . وتفكر ازاي ممكن تدمجها في تصميمك الجاي.. وحاول تفهم كويس احتياجات الإنسان علشان يبقى مرتاح في الفراغ اللي بتصممه .. ونصحيتي ، حاول تخلي اي خط بتعمله في المشروع له فائدة. ومرن إيدك على الرسم باستمرار والإحساس بالنسب الكويسة ، واستخدام البرامج في التصميم (خلي بالك إن استخدام البرامج في التصميم يختلف عن استخدامها في الإظهار)...

الملاحظة المهمة جدا : متخليش إعدادات البرنامج تحجم أفكارك أو بمعنى آخر متخليش افكارك أسيرة لوظائف البرنامج.
لو حابب تتخصص في الرسومات التنفيذيدة .. اتفرج على لوح تنفيذية ، وقوي نفسك اوي في برامج الووركينج زي الأوتوكاد والريفيت ، وحاول تعرف طرق تركيب أي حاجة تقع عينك عليها وطرق تنفيذها.

لو حابب تتخصص في الإظهار المعماري والأنيميشن .. 
حاول تخلي نفسك متميز في المجال دا علشان تتعرف وسط الناس . اعمل لنفسك برتوفوليو جامد جدا وحاول تنوع شغل اظهار مانيوال وبرامج و ماكيتات .. اتعلم كل ما هو جديد.
بالتوفيق إن شاء الله .


1/08/2015

MIT Introduction to Computer Science and Programming Using Python

دورة مقدمة في علوم الحاسب والبرمجة بلغة البايثون المقدمة من معهد ماساتشوستس للتكنولوجيا قسم علوم الحاسب
الدورة بدأت يوم الأربعاء 7-1-2015 ..
 البرمجة من الاتجاهات شديدة الأهمية في المرحلة القادمة في حياة البشرية.في جميع المجالات.حتى إنها أصبحت تدرس في المدارس الإبتدائية في أوروبا واليابان وأمريكا.
. فكر في سرعة الحواسب الشخصية والتي يمكنها أن تقوم ببلايين العمليات الحسابية في الثانية الواحدة .
 فكر في إنشاء برامج و عمليات تسهل الوصول  إلى أهدافك بسرعة اكبر في مجال عملك.
.فكر في التحول من مستخدم إلى مطور .